Хятадад байцааг формальдегидээр боловсруулсан зөрчил илэрлээ: Монголын импортын хүнсний хяналт хаана байна вэ?
Өмнөд Солонгос Хятадын хүнсний ногоонд тавих хяналтаа шууд чангатгав. Харин Монгол Улс яах вэ?
Хятадын Хэбэй мужийн Каньбао хошуунд байцааг тээвэрлэх явцад шинэлэг байдлыг нь удаан хадгалах зорилгоор формальдегидийн уусмал ашигласан гэх бичлэг цахим орчинд тархсаны дараа Хятадын холбогдох байгууллагууд шалгалт эхлүүлжээ.
Орон нутгийн анхны шалгалтаар байцаа тээвэрлэх үед формальдегидийн уусмал ашигласан үйлдэл бодит болохыг тогтоосон бөгөөд Хятадын төв байгууллагууд асуудалтай байцааны нийлүүлэлтийн сүлжээг тогтоохын зэрэгцээ улс даяар хүнсний ногооны дээж авах, зах зээлийн шалгалт хийхийг үүрэг болгосон байна.
Формальдегид гэж юу вэ?
Формальдегид нь олон улсын хорт хавдар судлалын байгууллагаас хүнд хорт хавдар үүсгэгч буюу 1-р бүлгийн хорт хавдар үүсгэгч ангилалд оруулсан химийн бодис юм. Үйлдвэрлэл, халдваргүйжүүлэлт болон биологийн эд, эрхтнийг хадгалах зэрэг зориулалтаар ашиглагддаг бөгөөд хүнсэнд хадгалалтын зорилгоор хэрэглэхийг хориглодог.
Гэтэл муудахаас сэргийлэх зорилгоор хүнсний ногоонд ийм бодис ашигласан нь тогтоогдсон нь зөвхөн Хятадын дотоодын асуудал биш, тус улсаас хүнс импортолдог орнуудын хувьд хүнсний аюулгүй байдлын ноцтой асуудал болж байна.
Өмнөд Солонгос: “Эхлээд шалгая” гэдэг зарчим
Энэ мэдээллийн дараа Өмнөд Солонгосын Хүнс, эмийн аюулгүй байдлын яам Хятадаас импортолж буй байцаанд тавих хяналтаа 8 дугаар сарын 24-нөөс эрчимжүүлж, формальдегидийн шинжилгээ хийж эхэлсэн.
Хамгийн сүүлийн мэдээллээр тус улсад гаалийн хяналтаар шалгасан Хятадын байцааны 8 ачилтаас формальдегид илрээгүй байна. Мөн дотоодын зах зээлд худалдаалагдаж буй Хятадын байцаатай холбоотой шинэ болон давсалсан байцаа, кимчиний 82 дээжийг шинжилж, бүгдэд нь формальдегид илрээгүй гэж мэдээлжээ.
Өөрөөр хэлбэл, Өмнөд Солонгос асуудал гарсан даруйд импортын хяналтаа нэмэгдүүлж, эрсдэлийг лабораторийн шинжилгээгээр шалгаж байна.
Харин Монгол Улс?
Монгол Улс урдаас хүнсний ногоо, жимс, бусад олон төрлийн хүнсний бүтээгдэхүүн импортолдог.
Тэгвэл бидэнд дараах асуулт зайлшгүй тавигдана.
Хятадын хүнсний ногоонд ийм зөрчил илэрсэн үед Монгол Улс хилээр орж ирж буй хүнсний ногоонд формальдегид болон бусад хориотой бодисын шинжилгээг хийж байгаа юу?
Сүүлийн үед Хятадаас импортолсон байцаа, лууван, сонгино, сармис болон бусад хүнсний ногоонд ямар лабораторийн шинжилгээ хийсэн бэ?
Аль боомтоор, ямар хэмжээний хүнсний ногоо орж ирсэн, ямар лабораторид, ямар үзүүлэлтээр шинжилсэн талаарх мэдээлэл олон нийтэд нээлттэй юу?
Энэ бол Хятадын бүх хүнсний бүтээгдэхүүнийг муулах тухай асуудал биш.
Харин хүнсний аюулгүй байдалд эргэлзээ үүссэн үед төр эрсдэлийг урьдчилан шалгаж, иргэдээ хамгаалж чадаж байна уу? гэдэг асуудал юм.
Иргэд “гадаадаас орж ирж байгаа хүнс аюулгүй болов уу” гэж айж суух ёсгүй. Төрийн хяналтын байгууллага нь “аюулгүй” гэдгийг лабораторийн шинжилгээгээр нотолж, үр дүнг нь олон нийтэд мэдээлдэг байх ёстой.
Иргэдийн эрүүл мэнд нэгдүгээрт
Хүнсний бүтээгдэхүүний гарал үүсэл аль улс вэ гэдгээс илүүтэй аюулгүй эсэх нь хамгийн чухал.
Гэхдээ нэгэнт тодорхой улс, бүс нутагт хүнсний бүтээгдэхүүнийг хориотой химийн бодисоор боловсруулах бодит зөрчил илэрсэн бол тухайн улсаас импортолж буй ижил төрлийн бүтээгдэхүүнд тавих хяналтыг нэмэгдүүлэх нь эрсдэлийн удирдлагын наад захын шаардлага.
Өмнөд Солонгос ингэж ажиллаж байна.
Монгол Улс ч бас хүлээж суух биш, шууд шалгах цаг болжээ.
Иргэдэд айдас төрүүлэхээс илүүтэй баримтад тулгуурласан, лабораторийн шинжилгээний бодит мэдээлэл хэрэгтэй байна.
Хятадаас Монголд импортолж буй хүнсний ногоонд формальдегидийн шинжилгээ хийж, дүнг нь олон нийтэд ил болгохыг холбогдох байгууллагуудаас шаардах нь зүйтэй.