Ховд аймгийн Буянт сум үүсэн байгуулагдсаны түүхт 100 жилийн ойн баяр наадмын нээлтийн ажиллагаа эхэллээ
Ховд аймгийн Буянт сум үүсэн байгуулагдсаны түүхт 100 жилийн ойн баяр наадам өнөөдөр ёслол төгөлдөр эхэлж байна.
Түүхт ойгоо тэмдэглэн өнгөрүүлэх баяр наадмын нээлтийн ажиллагаанд сум орон нутгийн удирдлагууд, үе үеийн ахмад буурлууд, хөдөлмөр бүтээлээрээ сум орон нутгийнхаа хөгжилд үнэтэй хувь нэмэр оруулсан эрхэм хүндэт иргэд, уяачид, бөхчүүд, харваачид болон нутгийн зон олон өргөнөөр оролцож байна.
Нээлтийн ажиллагааны үеэр Буянт сумын түүх, уламжлал, хөгжил дэвшлийг харуулсан ёслолын үйл ажиллагаа, урлаг соёлын тоглолт зохион байгуулагдаж, түүхт 100 жилийн ойгоо тэмдэглэн буй нутгийн иргэдийн баяр бахархлыг хуваалцлаа.
Буянт сумын түүхэн замнал нь үе үеийн иргэдийн хөдөлмөр зүтгэл, бүтээн байгуулалт, өв соёл, уламжлалтай салшгүй холбоотой билээ. Тус сумын уугуул, суугуул иргэд түүхт ойн баяраараа өнгөрсөн 100 жилийнхээ түүхийг дурсаж, өнөөдрийн бүтээн байгуулалт, маргаашийн хөгжлийн зорилтоо тодорхойлон, ирээдүй хойч үедээ өвлүүлэх үнэт зүйлсээ эрхэмлэн тэмдэглэж байна.
100 жилийн ойг тохиолдуулан үндэсний бөх, хурдан морины уралдаан, сур, шагайн харваа болон урлаг, соёл, спортын олон төрлийн арга хэмжээ зохион байгуулагдаж, наадамчин олныг баясгаж байна.
Ийнхүү Ховд нутгийн түүх, соёл, уламжлалын нэгэн чухал өлгий болсон Буянт сумын түүхт 100 жилийн ойн баяр наадам өргөн дэлгэр, эрүүл энх, аз хийморь, баяр цэнгэлээр дүүрэн үргэлжилж байна.